ساعات ياما...

[كريم افوكاتو]

بقلم
د/ آمال محمود كحيل


ساعات يا ما وانا لوحدي، في عز الليل
باشوف صورتك في نور نجمة وضي قنديل
باشوف طيفك كما النسمة وفجأة يزول
وييجي الشوق ياخدني معاه
على جناحه وبيه يميل
يصحي الذكرى والماضي
والاقي روحي بتنادي
عليكي ودمع عيني يسيل
ساعات يا أمي باندهلك
وانا عارفة
ندايا موش هايوصلك
وباشعر إني من غيرك
وحيدة وقلبي محتاجلك
تشيلي الحزن من جواه
وترجع فرحته بقربك
ساعات باحلم حقيقي
إنك ف حضني
وانا ف حضنك
باحس برعشتي لنبضك
بكل الحب جواكي بحنان قلبك
وآآآآه يا أمي واحشاني
وباشتاقلك
وباتمنى تكوني معايا
من تاني
أبصلك وأسمعلك
وتحكيلي وأحكيلك
وتشكيلي وافضفضلك
وابوس إيدك وابوس خدك
ساعات بسأل
يا أمي ليه تركتيني
مع الأحزان وفتيني
هنا لوحدي؟
بقيت خايفة ، بقيت تايهة
ومن غلبي باقول يا سنين
قوام عدي
ما فيش بهجة زارت قلبي
واهي الأيام بقت ضدي
وصورالماضي في عينيه
طيوف حواليه
بتهدي
باتوه معها ، وبافتكرك
وانا غارقة في ليل سهدي
ياما سهرتي و ياما تعبتي
يا ماتحملتي و صبرتي
رويتي بدمعتك حلمي ،
وآآآآه يا أغلى من دمي
كان بودي ، كان بودي
أشوف الفرحة في عيونك
واخفف عنك همومك
لكن يا أمي ما بيدي
ساعات ياما
في وسط الناس باتوه واغرق في دوامة
من الحيرة، من الأفكار
وليل ونهار،
باحس بوحشة جوايا
وفي ضلوعي تشب النار
وانادي عليكي يا أمي
ويملاني شعور بالذنب
واناجي بدمعتي ربي أقول يا رب
يا دنيا ليه ظلمتيني
وأغلى الناس حرمتيني؟
شربت المر من كاسك
ومين مرك ينسيني؟
وإيه فاضل عشان تاخديه؟
وإيه تاني حاتديني؟
لا جرح جديد ها يدميني
ولا شهدك ها يرويني
عذاب يا دنيا ؟ جربته ،
ألم ؟؟ يا ما الألم دقته ،
وبايديكي سقيتيني
خدي عمري، ويكفيني
أنام ساعة عشان أحلم
وانادي عليها، وتجيني
وإيه عمري قصاد لحظة
أشوفها فيها، تحييني ؟